Diir Jassin (arabisch دير ياسين Dair Yāsīn bzw. im palestinensische Dialäkt Dēr Yāsīn) isch e palestinänsischs Dorf gsi, am Blatz wo hüte die orthodoxi Siidlig Giv'at Scha'ul im Nordweste vo Jerusalem lit. S Dorf het öbbe 600 Iiwooner gha, wo s am 9. April 1948[1] wääred em Bürgerchrieg in Palestina vo paramilidäärische Verbänd vo de Undergrundorganisazioone Irgun Zwai Leumi (Etzel) und Lechi aagriffe und iignoo worde isch. Wil s e Hufe ziviili Opfer gee het, säit mä dere Akzioon au s Massaker vo Diir Jassin.
Arabischi Kämpfer und bewaffneti Iiwooner häi sich in de Hüüser zämme mit Ziviliste verschanzt und vo dört us uf d Aagrifer gschosse. Die si druf vo Huus zu Huus gange und häi Handgranaate dur d Fänster gheit. D Erooberig vo Diir Jassins het meereri Stunde brucht.
E Däil vo de Fraue si umchoo, wil sich araabischi Manne zum Däil als Fraue verchläidet häi. Dorum häi mänggi jüüdisch Soldaate nid nume uf araabischi Soldaate gschosse sondern au uf Ziviliste.
S Massaker isch offiziell vo alle Site verurdäilt worde, au vo dr Hagana und dr Jewish Agency.[2] Es isch äine vo de Gründ gsi, dass wo dr Palestinachrieg am 14. Mai 1948 richdig aagfange het – also 35 Dääg spööter – scho zwüsche 250'000 und 300'000 araabische Palestinänser scho gflüchdet si.
© MMXXIII Rich X Search. We shall prevail. All rights reserved. Rich X Search